بلوچستان : دالبندین اور زیارت کراس میں میں 21 دہشت گرد ہلاک، 6 اہلکار شہید

راولپنڈی: (ائی ایس پی ار) پاک فوج کے شعبہ تعلقات عامہ (آئی ایس پی آر) کے مطابق، 31 اگست اور یکم ستمبر کی درمیانی شب ضلع چاغی کے علاقے نوکچا اور ضلع پشین کے زیارت کراس پر پیش آنے والے مختلف واقعات میں سیکیورٹی فورسز کی موثر جوابی کارروائی کے نتیجے میں بھارتی سرپرست یافتہ پراکسیز ‘فتنہ الہندستان’ اور ‘فتنہ الخوارج’ سے تعلق رکھنے والے 21 دہشت گرد ہلاک ہوئے ہیں ۔
این 40 شاہراہ پر کارروائی 📍
31 اگست کو ‘فتنہ الہندستان’ کے دہشت گردوں نے کوئٹہ۔تفتان قومی شاہراہ (N-40) پر ناکہ لگا کر بھتہ وصولی کی کوشش کی اور مسافروں کی پرامن نقل و حرکت میں خلل ڈالا۔ سیکیورٹی فورسز نے فوری طور پر جوابی کارروائی کرتے ہوئے شدید فائرنگ کے تبادلے کے بعد موقع پر ہی 11 دہشت گردوں کو ہلاک کر دیا۔ دہشت گردوں کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد کیا گیا ہے۔
کسٹمز ہاؤس پر حملہ اور دہشت گرد-جرائم گٹھ جوڑ
دوسری جانب 31 اگست اور یکم ستمبر کی درمیانی شب ‘فتنہ الخوارج’ کے دہشت گردوں نے کسٹمز ہاؤس پر تسلط کی غرض سے ایک مربوط حملہ کیا۔ سیکیورٹی فورسز نے مؤثر جواب دیتے ہوئے شدید فائرنگ کے تبادلے میں 10 دہشت گردوں کو ہلاک کر دیا۔ اس کے علاوہ، فرار ہونے والے دہشت گردوں کو بھی سیکیورٹی فورسز نے گھیرے میں لے کر مزید جانی نقصان پہنچایا۔
کسٹمز ہاؤس پر حملہ دہشت گردی اور جرائم کے گٹھ جوڑ کا واضح ثبوت ہے، جسے کسٹمز حکام کو ان کے قانونی فرائض کی انجام دہی سے روکنے اور علاقے میں غیر قانونی سرگرمیوں کو جاری رکھنے کے لیے سازش کے تحت ترتیب دیا گیا۔
اس شدید فائرنگ کے تبادلے کے دوران وطن کے 6 بہادر سپوتوں، جن میں دو افسران اور کسٹمز ڈیپارٹمنٹ کا ایک سرکاری اہلکار بھی شامل ہے، نے فرائض کی انجام دہی کے دوران جامِ شہادت نوش کیا۔
سینیٹائزیشن آپریشنز اور عزمِ استحکام
علاقے سے باقی ماندہ دہشت گردوں کے خاتمے اور مقامی آبادی نیز اہم قومی شاہراہوں کی مکمل سیکیورٹی کو یقینی بنانے کے لیے گردونواح میں کلین اپ اور سینیٹائزیشن آپریشنز تاحال جاری ہیں۔
‎وفاقی ایپکس کمیٹی برائے نیشنل ایکشن پلان کی منظوری سے شروع کی جانے والی “عزمِ استحکام” مہم کے تحت انسدادِ دہشت گردی کی یہ بھرپور کارروائیاں پورے عزم کے ساتھ جاری رہیں گی۔ سیکیورٹی فورسز اور قانون نافذ کرنے والے ادارے ملک سے غیر ملکی حمایت یافتہ دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔
‎